अट्टल चोरटा मी........!!

अट्टल चोरटा मी........!!

नभात हिंडताना आणि तारे न्याहाळताना
कळतच नाही मी कसा तल्लीन होवून जातो
ते दृश्य डोळ्यात मी पुरेपूर साठवून घेतो
आणि ते लुकलुकते लावण्य चोरण्याची
मी चोरी करून जातो .....!!

जीवनाचे विविधरंग उलगडणारे शब्द
कुणीतरी सहज बोलून जातो
अलगद पकडून ते शब्द मी तादात्म पावतो
आणि दिव्यत्वाचे चार शब्द चोरण्याची
मी चोरी करून जातो .....!!

ऐकताना गुणगूण, पापण्या थबकतात
नजर स्थिर होवून मन डोलायला लागते
कुणीतरी मधुर तरंग हवेवर पेरून जातो
आणि ती नादब्रह्माची लय चोरण्याची
मी चोरी करून जातो .....!!

वार्‍यापासून बळ चोरतो, सूर्यापासून आग
ढगापासून छाया चोरतो, संतांपासून राग
चोरतो मी ज्ञानमार्ग विवेकाच्या वृद्धीसाठी
सद्‍गुणांची उचलेगिरी अंतराच्या शुद्धीसाठी
असा अभय भामटा मी
असा अट्टल चोरटा मी.......!!

गंगाधर मुटे
....................................................................
(रानमेवा काव्यसंग्रह - प्रकाशन दि. १०.११.२०१०)
....................................................................