ओल्यागच्च हिरव्यागार शुभेच्छा ......!!

ज्यांना-ज्यांना मी मित्रासारखा दिसतो

जे-जे मला जीवाभावाने मित्र समजतात.....
त्या सर्व माझ्या मित्र-मैत्रिणींना......
ऋणानुबंधाच्या
मुसळधार पावसासारख्या
ओल्यागच्च हिरव्यागार शुभेच्छा ......!!

                             - गंगाधर मुटे
~~~~~~~~~~~~~~~~~~~~~~~~~
माझ्या सर्व मित्र-मैत्रिणींना समर्पित कविता

मैत्र झुलवून बघ

चेहऱ्यावरती खिळू नकोस
आत उतरून बघ
अंतरीच्या झोपाळ्यावर
मैत्र झुलवून बघ

नितळलेल्या तळावरती
विश्वासाचे घर
हाय, हॅलो जाऊ देत
हात घट्ट धर

अटी-शर्ती काही नकोत
खुले-खुले सांग
तेव्हा तुला कळेल माझ्या
हृदयाचा थांग

दिसतो तसा नाही मी
कठोर आणि क्रूर
काळिजाच्या सप्तकाला
अवरोहाचे सूर

देत बसत नाही मित्रा
पुन्हा पुन्हा ग्वाही
पण तू जसा समजतोस
मी तसा नाही

मोजत बसू नकोस मित्रा
स्पंदनाची धग
डोळे मिटून खांद्यावरती
मान ठेवून बघ

चिंता नकोस करू मित्रा
'अभय'तेने तेव
वादळासंगे लढेन मी
इतका विश्वास ठेव

               - गंगाधर मुटे 'अभय'
~~~~~~~~~~~~~~~~~~~~~~

प्रतिक्रिया

विनिता's picture

व्वा छान Smile

गंगाधर मुटे's picture

धन्यवाद विनिताजी,

कालच्या मैत्रीदिनाच्या धबडग्यात या कवितेचे मातेरे झाले आहे. या कवितेवर फेसबूक आणि व्हाटसअ‍ॅपवर फारसे प्रतिसाद आले नाहीत, याची खंत नाही मात्र ही कविता वाचलीच गेली नाही याची, एवढा अदमास आल्याने जरा हिरमोड झालाच.

यापुढे कोणत्याही दिनाच्या निमित्ताने नवीन कविता लिहायची नाही आणि लिहिलीच तर त्या दिवशी अजिबात प्रकाशित करायची नाही, या निर्णयाप्रत मी आलेलो आहे. Smile

ही कविता उत्कृष्ट कविता आहे, याची माझी मलाच खात्री आहे.

---------------------------------------
माझी वाङ्मयशेती - फेसबूकपेज
---------------------------------------